انا ليتـــا مريــت دارك وهلـــيت=وش ضيفتي يا مكرمين الأجاويد
وإلا أجيب الــزاد والخــل والـزيت=وانت عليك المبخــرة والــزغاريد
وان كان لا هــاذي ولا ذي مــريت=دورت لي ناس لهـم شوفتي عيد
وإما غزيت الشام وأطراف تكريت=يلقى بها قلبي من الزين ما أريد
وإلا هويت من الخلاء بنت عفريت=ممشـوقة القامـة ومصقولة الجيد
انا اسمـع إن الجن ياكيت من كيت=ماهم سواة الأنس خلق مقـــاريد
تقضي الحاجـــات من دون توقيت=تعشـق هواي وشوقهـا دائم يزيد
ماهـي بحـاجة طـــائرات ولا ونيت=ولا هي بحــاجة للكتب والمواعيـد
ليا ندهت الها تجيني على الصيت=وليا بغتني جات من دون تعقيد
ولاتي بخـائف دامني رأس لثبيت=اهل السيوف المصقــلة والبـواريد
أعطي بلا منـة ولا أرد ما أعطيــت=وأســدد الأفـكار بالفكــر تســديد
ابني بيوت الشعر بيت بعد بيت=واحدد أهدافي على الكيف تحـديد
اشرب قراح العـدّ وإن شان هديت=فوقــه نثيــله لو تقـــل المــواريد
وإن جئتني يامرحبا الـف حييت=أفرش لك دروب الغلا بالسجاجيد
الدار دارك وأنت واحد من البيت=راعي محل ماأنت غريب ولا بعيد
تلقى مناك وتهنني بمــا تمنيت=وتصير لي سيــد وأنا مثلكم سيـد
وليا شعرت إنك من الدار مليـت=وداعـة اللــه عـود والعــود تحميد