ياشوق انا واياك نشكي من عقوق=عقوق جمع الشمل في عرف الهوى
يا ليتني واياك عاشق ومعشوق=نروي عروق الشوق من عد الروى
تروى القصائد والمشاعر والعروق=لا من تجمعنا بذا الدنيا سوا
هذا دوا قلبي وقلبك يا شروق=ما فيه غيره يا بعد عمري دوا
شروق رمز اسمك ورسمك فوق فوق=فوق الثريا والعذارى ما هوى
لكن من دونك محاذيرٍ(ن)تعوق=تعوق وصلي كنها نزع الشوى
وانا بعد قلبي من العشق محروق=من زود ما بي ذاب قلبي وانكوا
يا راقية يا ذوق مدري فوق ذوق=تفداك روحي والفؤاد وما حوى
ودي اسلطن معك والخاطر يروق=لكن يا ويلاه قربك ما نوى
ما حيلتي الا مجارير وطروق=ما كنها إلا صدى صوت العوى
أعوي عوى سرحان ما يلقى ريوق=الجوع يعصر فيه والحظ التوى
في داخله من قسوة أيامه شقوق=تنزف معاليقه بعد حظه ثوى
بيني وبين الذئب ما بعرف فروق=نجوع ما نطلب معونة من غوى
ياشوق انا واياك نشكي من عقوق=عقوق جمع الشمل في عرف الهوى