قلت:بجن منك وقالت:أحسن شي=حين أحسك تجنن ينشرح بالي
قلت:ليش التجني والطغا والغي=وأنت عندي مكانك منزله عالي
قال:من شأن ما تعشق بعدنا حي=ما تشاهد عيونك بعدنا حالي
قلت:عشقي حبيبي مضحك مبكي=قالت: أدري وهذا شاهد أفعالي
قلت:ليتك تجمل يا حبيب شوي=تسمح بشوفتك في وقتي التالي
لو تجمل حبيبي قلت لك:مرسي=ولو تكرم عليً بشربة زلالي
لاتكن بس قاسي والقسا يقسي=وأنت تدري بمنطوقي ومرسالي
العطش من هوى يغلب عطوش المي=وأنت نشفت ريقي يا بعد حالي
صرت كني حجر مبني عليه الطي=أروحْ الماء وأشوفه ما تهيا لي
صالبٍ(ن)في مكاني ما هنيت بري=أتوجد وقلبي فيه زلزالي
آه وا كي قلبي يا غرامي كي=كن بالقلب نارٍ(ن)جمرها صالي
كل ما مر طيفك صار وضعي سي=بين زفرة و ونة بي ولوالي
ودي أجيك وإلا هواي اتجي=تمسح الذاكرة من كل غربالي
مير حلمي سنين طوال ما يزكي=أتمنى وحنا بدبرة الوالي
لي سنينٍ(ن)طويلة من هواك الني=تنزف عروق قلبي والجسم بالي
هم بعدك لواني يامناتي لي=والسهر والتمني قطع أوصالي
وأنت مدري وش اللي متعبك ياخي=دامك الغالي اللي بالحشا غالي
لو طلبت العيون ورمشها وصبيَي=قلت:تأمر تجي لك قبل ما تسالي
كلها لأجل عينك يا غلا تفدي=كل ما هو ملكته حالي ومالي
بالنهاية تراني بالهوى مبلي=والمصيبة أخافه يحبط أعمالي
كان:بجن منك وقلت:فأحسن شي=لو حبك تجنن ينشرح بالي