أسعدكم الله أينما كنتم
اليكم الأبيات علها تروق لكم
طول غيابك يازعيم الغنادير=عامين حالي مثل حال اليتاما
كسر غيابك حلو الأحلام تكسير=باتت بصدري ضامياتٍ(ن)حياما
عامين وأحلامي بليلي طوابير=و عروق قلبي والمشاعر سقاما
اسلي الخاطر بشعر ومشاوير=اون في مقعد واون بقياما
البعد يسعر جمر الأشواق تسعير=ياليتها عليّ برد وسلاما
ولى ربيع الوصل يا علها خير=ما فات صعب نرجعه بالكلاما
وين الغصون اليانعات المزاهير=ما كنها عجت بريح الخزاما
ما باقي إلا ذكرياتٍ(ن)مزابير=تسري معي لا حل وقت الظلاما
جتني على خيل الهواجس مغاوير=وحظوظنا بيدينهن الخطاما
احيان يشبه لونها للمغاتير=لكنها من دون ذروة سناما
ذكرت وقتٍ(ن)طار طيرة عصافير=صحت رسومه للحلوم النياما
أذكر لقانا قبل عامين بعصير=في غفلة الحساد وأهل الملاما
ساعة زمن لكنها بالعمر غير=قابلت من حبه لشعري وساما
من شوفته حسيت بالنفس تغيير=ضاع الحكي كن الحقيقة حلاما
قدمت له قبل السلام المعاذير=ورديت من بعد العذر للسلاما
وأذكر لقلبي يوم يرقص مثل طير=بين الضلوع من الفرح والغراما
أذكر لمشية سيد البيض بالسير=ما كنه إلا مشي فرخ الحماما
وأذكر لعطرٍ(ن)عطر الجو تعطير=ذيك العيون اللي زهت باللثاما
أذكر كفوفٍ(ن)جملتها المناكير=وشفاه وردية وحسن إبتساما
وأذكر مخافة لا يجي شيء تقصير=من يمنا حلال وإلا حراما
في داخلي مليون هاجس وتفكير=بين والرجا واليأس جيعا صياما
ودي و ودي مير يا حظنا مير=أحلامنا ما حققت بالتماما
جينا مسايير ورجعنا مسايير=وأطماعنا بين الحنايا تواما
من خوف لا يلحق هوانا محاذير=شمنا عن الزلة سواة النشاما
الشوق ما أنسانا طبوع المسافير=على الوفا والطيب نهوى كراما
لو النفوس من المحبة معاثير= أوجاعها وصلت لمخ العظاما
نصبر على اللي دبرته المقادير=ونجدد الونات في كل عاما
ما عاد باقي في يدينا تدابير=ما باقي إلا ذكرياتٍ(ن)وياما
أيام أصبر خاطري غصب تصبير=الجرح ينزف والمواجع تراما
على خفوقٍ(ن)ما عرف يوم تخدير=عدة سنين وتاليتها عداما
سهم الهوى صابه ولا فيه تبرير=سهم المحبة غير كل السهاما
اللي تصيبة مثل من طاح بالبير=إن ما غرق راحت عظامه حطاما
ركع ملوك وذل ناسٍ(ن)مشاهير=ما فيه قلب إلا غزاه الهياما
سنة وجود تمر في شيخ وصغير=تدبير من دبر لكل الأناما
كل كائنٍ(ن)بالكون بصره تبصير=سبحان من نزل لقطر الغماما
ساق السحاب ونزل الغيث تقطير=أسقا الشوامخ والسهل والعداما
قدر لنا الأرزاق والعمر تقدير=مافيه حي إلا حياته من الما
أحد بسعة فالرزق وأحدٍ(ن)بتقتير=وأوعد عباده بالعفو والرحاما
وصلوا على اللي طور العقل تطوير=الشافع المنقذ بيوم الزحاما
المهدي اللي كبر الله تكبير=يا حظ منهو صدقه وإستقاما
وختامها يالله طالبك تطهير=تجعل لخير أيامنا بالختاما