يابنت قولي عسى منتي مخطوبة
يابنت في حبنا منتي بمغصوبه = والنفس في حبكم ماني بغاصبها
عذالي اللي حبيب القلب صدوبه = عذالي اسباب ماجاها وصدبها
القلب والروح يالاجواد منهوبه = بالود والحب صافي اللون ناهبها
ايامي اللي مضت ماهي بمحسوبه = واسنيني الماضيه ماني بحاسبها
احب طرق الهواء واحب ملعوبه = والنفس تشتاق واشواقي تلاعبها
افرح لياجاتني الاخبار من صوبه = له منزله داخل الخافق مناصبها
تهمني شوفته وافرح بمكتوبه = تسلم لي ارسالته وايدين كاتبها
يادوب يفهم سلوم الحب يادوبه = صغيرة السن موتي من سبايبها
عزيزة الجاه يالاجواد منجوبه = تسال عن حبها عندي واجاوبها
هي غايتي هي منى قلبي ومطلوبه = عندي غلاها كما عيني وحاجبها
بنت الرجال الكفو بالستر محجوبه = في حشمة ارجالها وفي قدر شايبها
يابنت قولي عسى مانتي بمخطوبه = يابنت مثلك ملاك بقلب خاطبها
العين تدمع وكن العين مضروبه = ادموعها سيل صافي اللون ضاربها
دكتور قلبي مريض وماخذه نوبه = دنيا الشقاء كلها خضنا تجاربها
الناس تلعب بقلبي لين غروبه = عزي لمن شيمته والنفس غربها
وعزي لمن لابته بالدرب خانوبه = وعزي لمن في دروب الطيب خانبها
وعزي لمن عزوته في الضيق باروبه = وعزي لمن خان في العزوه وباربها
ما اساير النذل واجنب عن ادروبه = النذل نفسه على الزلات دربها
نفسه اسيره من الشيطان مغلوبه = استسلمت له وهو بالحيل غالبها
الانذال لاسمعت الطاروق غنوبه = وتزيد بالقول وتسمع قرايبها
كثير قالوا بنا وكثير قالوبه = اهروج الانذال احللها واقلبها
بعض العرب يفتخر ياجعل ماهوبه = مايدري ان البلا بالنفس قاضبها
الصيد من ديرته والله ماجوبه = هرج القفا والنمايم من مكاسبها
الحـرب والتفرقه والشين نادوبه = اللحيه الوافيه تحمـي شواربها
ياناس ياناس خلي ويش سووبه = صدق هروج القفى وعيا يكذبها
متغير منهجه ومغير اسلوبه = كل المواثيق خانبها وساحبها
امنول غايتي زينه ومحبوبه = واليوم متغيره خانت حبايبها
من عاب بالناس لايتجاهل اعيوبه = النفس حق عليه انه يعاتبها
اخير من نمته يراجع اذنوبه = ويتوب توبة نصوح صح تايبها
الاعراف ضيعتها وتقول مشطوبه = يوم استوى صاحي العالم وعايبها
في بعض الاحيان احس الرجل معطوبه = معطوبة من كثير الهم معطبها
يابنت هذي صفات النذل مكتوبه = كتبتها لجل من عينه يشوفبها
ابن ادم اضعيف نفس ويستره ثوبه = والعين ماكل من شافت بيعجبها
ياناعم العود والخصرين مسلوبه = ياناعس الطرف سم الكبد لاجبها
ابو جدايل على الارداف مسروبه = حرام ماشفت مثل الزين ساربها
يامل قلب مع الاجواد راحوبه = جسمي بلا روح والساري يعذبها
ياشف بالي عسى مانتي بمخطوبه = خيال صوره تخاطبني واخاطبها
الشاعر غير معروف