بلا جنحان أسافر طايرٍ لا شفت عينك
تعليني رموشك فوق غيماتٍ بعيدة


تسيّرني وتلعبّي وتحملني ظنينك
وتهزم قلبي اللي عايشٍ بك في وريدة


واسافر آه يامَحْلى السفر وانا رهينك
أسافر في جنان الكون وزهورٍ نضيدة


واطير بْدنيِةٍ ما شفت فيها غير زينك
على كثر النجوم اللي بها انتي الوحيدة


أنا ظر زينك وْأهوى عذاريبك وشينك
واحط الكف فوق الخد والفرحة شديدة


أنا مالي مرايا غير نورٍ في جبينك
أعدّل ْ فيه هِنْدامي ولو كنتي عنيدة


بدال مْرايتك ليتك تناظر في يمينك
رسم نورك شعاعه في المرايا من يكيدة؟


أشوفك عقد ألماسٍ عيوني لاحقينك
أنا عْيوني غَدَتْ من وجهك عْقودٍ فريدة


جمع صوتك خرير الما وموجه من رنينك
جمع صوت الشجر وردٍ وطيرٍ وتْغَريدة


إلى منّك عزفتي غصب عنا سامعينك
والى منّك سكتّي شوقنا صوتك يزيدة


مسح نورك نجوم الفضا هم باغضينك
ولاَ الغيمات تحجب لك قصورٍ هي مشيدة


عيونك لَهْمست همسٍ عيوني فاهمينك
ولو في رمشك رْموزٍ صعيبات ومكيدة


أنا لك لو جزيرة من سرابٍ واصلينك
وانا لك كنت ظلٍّ أو هوا لازم أصيدة