السلام عليكم ورحمة الله وبركاته
الأبيات بدون مقدمات
ذي سحايب عشقي المجنون ساقتها رياحي=رعدها برض الحجاز وسيلها شرق الجزيره
بالنهار وبالهجاد وبالعشي وبالصباحي=العواصف بالخفوق ومشعلة نار(ن)سعيره
والطبيب اللي يعرف بطب طعنات الرماحي=ساكن(ن)شرق السعودية محاذي للفجيره
وإن طلبته بالعياده قالوا الدكتور راحي=كيف أسوي عيني تشوف الدوا يدي قصيره
بصروني كيف أسوي يا مجربة الجراحي=حار فكري والطعون وساع والحالة خطيره
يا طبيبي إرفق بحالي وهون من صياحي=كني اللي كاتفينه بالحبال وبالجبيره
العروق تضخ دم(ن)كنه الغلاي فاحي=والنفس مكروب والعيشة غدت علقم مريره
يا طبيبي خاف ربك كان في قلبك صلاحي=لا تجاهلني ترى الدنيا رحاة(ن)مستديره
ارسل الإسعاف توك قبل ياصلك النياحي=صارت الأيام في عيني سويعات حقيره
لا تهاون في علاجي كان تبغا للسماحي=القطار يمر وأنا راكب(ن)بأخر قطيره
ذا كلام الجد يا دكتور ما عندي مزاحي=وأنت تعرف بالعلاج ومطلع فوق السريره
يا طبيبي لا توخر كان ودك برتياحي=حالتي صعبه وقلبي أنت تعرف وش مصيره
يا طبيبي أنت من يعرف بقلبي كيف طاحي=وأنت وحدك تعرف بطبه وتعرف وش يجيره
ذي سحايب عشقي المجنون ساقتها رياحي=رعدها برض الحجاز وسيلها شرق الجزيره