وينك البارح حبيبي ...؟!
احتريتك لين مَلّن الشفايف
وزعَلَن ...!!
والعسل جف
وكانت الليله براد ... وقلبي خايف ... وارتجف رجف
ومات بعض الليل بعيوني
وبعضه ذاب فيني
والشتاء ليله كئيب وفيه ظلماء ...
والحطب ضلعين سلمى ...!!
والهوى شين
ما بكيتك ... بس نحت شوي
ادري ما تبيني ...!!
بوستي من عام واكثر باقيه بين الشفايف
باقية لليوم فيني ... إي وربي تحتريك
ما تبي تطلع لغيرك ...
وانت ما فكرت فيني ... كَثَر الله الف خيرك
ادري القى الف غيرك
بس غيرك ما يعرفون " إيتيكيتات الشفايف "
وش اسوي ...؟!
انت قل لي ...!!
وغير هذا فيني ضمة
كل ما شافتك تصرخ " آآآآيا يُمه ... ابا اخمه "
وآنا اهديها ... واجرجرها
واقول لها " استحي يا احلى ضمة
اثقلي يمكن تسوقه ذكرياته ذيك الأيام ويجيك
يمكن الذكرى تخُمه "
قولي " يارب "
وانتثر حضني يبيك
وذاااااااااااب ذوب
وقام يقطر مثل " دمعة طفل يتشَرَه على أُمه "
وفوق هذا دمعتينٍ بـ وسط عيني يابسات
وكلمتينٍ في شفاتي ... كل ماجيت اقولهم ذااااااااااابو عليك
دام بعض الشوق يضني ... اجتمع كلك بـ حضني ... لي ثلاث سنين ادولِـه هالحضن وآقول تكفى اصبر شوي
كلها ايام ويجيك
وما تجيه
وهو لحاله كنه طفل يلعب يابعد قلبي لحاله
بذمتك ترضيك حاله ...؟!
وينتفض كلش يبيك
يااااه منك ...!!
الهوى ... والعشق فنك
انت قاسي وانا احنك ... ليمِتى هالحال ضنك ...؟!
يعني لازم انتظر وصلك واعاني لين اموت ...؟!
اعرفك واعرف هبالك ... والله لو اقطر عسل ... ماجا بـ بالك
وماعليك
آهـ لو حسيت في ليل البنيّـة
الثواني فيه تشبهها السنين
دمعة منا
ودمعة منا
وشمعتين
وحاضنة دبدوبها الوردي بـ يديها
وتحتري شي ...!!
مرة تاقف
ومرة تجلس
ومرة تلعب في شعرها
ومرة تتأفف وترمي صدرها فوق السرير
وتنتفض نفضة وَلَه
وينتفض دبدوبها ... وتَحضّنه حييييييييييييييييييل ... وتنوم
معجبك ...؟!
والله قاسي ...!!