يسرني تقديم هذه الأبيات
علها تروق لأصحاب الذوق
قل لي حبيبي أخر أخبارك=مدري علامك ما تكلمني
طال الغياب وكثرت أسفارك=بين الرجا واليأس قاسمني
ودي أعرف بخافي أسرارك=من بعدنا وش صار فهمني
ما عاد نسمع عن أذكارك=بعد الرضا وش بك مخاصمني
مدري وش اللي غير أفكارك=لو كان تسمح زين علمني
ياما عزفت بروحي أوتارك=مدري طرب والا تعشمني
ناغم قصيدي عزف مزمارك=وأنت الذي بالشعر ملهمني
حتى رميت القلب في نارك=ما قلت لك يا زين ترحمني
أنت الذي بالقلب مقدارك=تعرفه ما ظني بتظلمني
اليوم مدري وينها دارك=بعد الأمل يا كيف تهدمني
عجل علي وجود بعذارك=حتى ولو كانت تحطمني
أنا تحت سيفك ومنشارك=بعثرتني تقدر تلملمني