ارقصي يا جنون الليل فوق المشاعر=خلي الشعر قيفانه بفكري تراقص
اشعلي في معاليق المعنى مجامر=خلي الليل يصحى دام فرحي تناقص
لا يهمك سهر جابر ولا ضيق جابر=مثل ما قالوا التجار بايع بناقص
السهر عادة السرحان وهجوس شاعر=والسهر ما يقصر عمر و العمر خالص
دام من هو يبعد ضيقة الصدر نافر=يا هجوسي معاليقي لهمك مراقص
سجلي ما جرى لي في بطون الدفاتر=عل ملهم قصيدي يعرف بحال قارص
غيبته يوم عني كنها سهم عابر=ما ترده عن عظام الرقاب القوانص
يا بديع الحسن يا طعم شهد وسكاكر=طحت بشراك حبك يابعد كل قانص
طالبك يا بعد روحي وأنا حيل شاكر=لا يطول الغياب ولا تزيد المفارص
كافي اللي حصل لي وأنت بالحال خابر=تعرف اللي بقلبي وأنت للعشق خارص
من سنينٍ(ن)طوال الحب بالقلب كافر=أنت وأنا مثل ما قيل هايص ولايص
مير ماني محدد يا جنون المسامر=حار فكري وقلبي بين لايص وهايص
ارقصي يا جنون الليل فوق المشاعر=خلي الشعر قيفانه بفكري تراقص