ذكرت رفعت برقعك عصر الإثنين=باللحظة اللي ما حفظت لملامحك
فالساعة اللي طاحت العين بالعين=جئتك بلهف الشوق والشوق ذابحك
من فرحتي ثارت بجوفي براكين=بغيت أموت الله بعفوه يسامحك
ومرت بعدها سنين وسنين وسنين=تجرحني الأيام والبعد جارحـك
يا ويل حالي كيف بقوى على البين=والقلب عندك غاطسٍ(ن)في مسابحك
الى متى يا كامل الحسن والزين=نقدر نقاوم يا بعد روح رابحك
الحب أنا وأنتِ(ي)ضحاياه الإثنين=ياليتني عن واقد الحب ناصحك
لكن أنا غشيم وأنتي ما تدرين=طحنا وكان ومعترف لك بصارحك
إنك غرامي يا هوى خاطري لين=الحظ يجمع بيننا ثم أصالحك
وأستسمحك يا غايتي لين ترضين=وأبلغك ما كنت بالحب أمازحك
أنتِ(ن)غرام الروح بالعسر واللين=من كل ما يجرح شعوري مبيحك
وأنتي مناة القلب بأول وذا لحين=من قبل لقيانا تميزك شارحك
يا كاملة بالذوق والحسن والدين=يا درة الأزمان في عين مادحك
ذكرت رفعت برقعك عصر الإثنين=باللحظة اللي ما حفظت لملامحك