يا شبيه صويحبي بالشكل مير طبوعه=نادره ما فيه عذرا بالنساء ماثلها
كل ما شفتك على الشاشة يجيني لوعه=ودي بشوف التي عجزت يوم أصالها
شفتها لمحة بعمري يالها من روعه=ليت شوفتها تكرر والعيون أكحلـها
أكحل لعيني بشوف الغروة الشعشوعه=شوفها يبري لنفسٍ(ن)غارقة بعللها
ما نسيت اللي بعين إلاهنا مصنوعه=الله اللي بالحسن فوق النساء كملـها
عودها ريان ترفة فوق للمربوعه=أشكر الله بالحيا فوق الحسن جملها
كنها بالمسك والعنبر سنة منقوعه=عطرها نار الغرام بخافقي أشعلها
شكلها لوحة بفكري من زمن مطبوعه=تعجز الأيام وسنين العمر تبْدلها
وصفها لو ينكتب على الورق موسوعه=مير قلبي ممتلي بأوصافها وحللها
كنها من جنة الفردوس لي منزوعه=مير حظي والزمن عن راحتي أشغلها
آآآه يا نفسي ما دامك بالغصب ممنوعه=المسافة دونها وظروفنا وأهلها
كل ما فكرت أجيها صابني فزوعه=خايف العذال تدري والحكي يزعلها
أتوجع والأماني داخلي مزروعه=ما تحقق لي ولاني قادرٍ(ن)أزهلها
حيث ولفي كنها من خافقي مقطوعه=كن ربي فوق قلبي بالغلا فصلها
الأوامر من حلومي للغلا مسموعه=أختصر قلبي معاناة الهوى من أولها
طاح فيها طيحةٍ(ن)ما عاد هي مرفوعه=لين تالي نبضةٍ(ن)مهما الزمن طولها
المصيبة روحي الولهى بها مفزوعه=خايفة سود الليالي للجفا ترسلها
الليالي ما تغير غايتي و طبوعه=نادره ما فيه عذرا بالنساء ماثلها