يا مشغلٍ(ن)للقلب ومسهر العين=بغيت ادق وخفت لتكون غافي
واطير لنومك وازعلك يازين=واضيق من فعلي لو القلب صـافي
واما انا نومي مجافي من سنين=عود عيوني للسهر بالتجافي
اسهر مع اطيافك على الزين والشين=ما فيه ليلة نمت فوقي لحافي
الليل كله أقتلب فوق جنبين=أحيان بردانٍ(ن)ومرات دافي
أحلم يزين الحظ لو كان يومين=ومرار أورى فيه وأحيان أعافي
لن طول غيابك تجيني طواعين=كن الخفوق تقطعه بالشلافي
والدم يغلي داخلي بالشرايين=من حرقةٍ(ن)خلف الضلوع النحافي
عليك ياللي بالمحبة تمونين=على خوفقي والشعر والقوافي
هواك سم الحال والعلة البين=اللي مسوي بالمحبة خلافي
أون وأنتِ(ي)مثل وني تونين=من لوعة الأشواق فينا خوافي
أدري بحالك مثل ما أنتِ(ي)بتدرين=عن حالتي ما بين سقم وتشافي
اقرأ شعورك في غيابك وتقرين=مشاعري بالشعر بان إرتجافي
مهما يطول الوقت مهما تغيبين=جمر الهوى بالقلب ماهو بطافي
غرامنا ماهو محاوج براهين=سيطر علينا والليالي عجافي
أنا بدار ومشغلي بالهوى وين؟=دونه ديارٍ(ن)شاسعاتٍ(ن)ياكافي
لكن غرامه بالحشا يا مهاوين=أكبر من المعقول حبه خرافي
عندي يساوي بالمحبة ملايين=لكن لعيون البشر ما يشافي
أغلى من السلطان عند السلاطين=اللي سحرني بالثمان الرهافي
لأجله ومن شأنه بجنب عزيزين=قدمي مكانه ما يعود خلافي
بنظم على شأنه بشعري دواوين=كل القصائد فيه والمد وافي
أهواه في عسر الليالي وفاللين=واللي كما معشوقتي ما يعافي
قلبي وكلي فدوته كامل الدين=كامل مكمل ما دخله إنحرافي
يستاهل التمجيد سيد المحبين=اللي ملك بالحب قلب السنافي
هذا وليف القلب ومسهر العين=بسهر مع أطيافه ولاني بغافي