أسعدكم الله بالخير والمسرات في كل الأماكن والأوقات
اليكم الأبيات بدون مقدمات
يامرحبا ياهلا يانبض خفاقي=ياريحة الورد مدري ريحة الجنه
جيتك هبت على روحي بالاشواقي=واستوطنت في حشاي ولا تعدنه
جيتك صحت خفوقٍ(ن)بالعنا ضاقي=قصائد الشوق برجوعك يهننه
قامت تقراقص بصدرٍ(ن)للقا تاقي=منقوشةٍ(ن)بالصخاف اللي يوالنه
هواك بني قصوره داخل اعماقي=على جميع المذاهب شيعه وسنه
كل العذارى هواهن شين ما لاقي=إلا أنت قلبي بحبك مبعد الظنّه
تغيب واشتاق لك وتعود واشتاقي=الشوق حامس لقلبي حمسة البنه
يابعد روحي وبعد اهلي على رفاقي=العمر كله فداك اخذه بلا منه
ماهو بيغلا عليك الحق على الباقي=قدام سود الليال الغبر ينهنه
أسكن بوسط العيون بداخل أحداقي=أشرب لصافي على شأنك يهلنه
وليا شكيت لوجع دواك بأرياقي=وإسق لمحبك مشاريبٍ(ن)يداونه
من نبع صافي غزير وعذب رقراقي=يبري جروح الغرام وحرقة الونه
للخافق اللي من الونات كم ذاقي=أيام وسنين قاساها وهدنه
مرت سنينٍ(ن)على الخفاق ما فاقي=يطرد ورى أطياف حلمه لين عننه
يسرح مساريحها والليل بعناقي=كل ما هجع للمنام أحلام سرنّه
الليل كله مع الأحلام بسباقي=على السهر والقهر دايم يحدنّه
وأنا أشهد إن الهوى للقلب حراقي=حرقته تغلب على مسٍ(ن)من الجنّه
ما يبري لجرحها مشفى ولا راقي=من لاظي الشوق مقرع قرعة الشنّه
مالي علاجٍ(ن)ولا مطعم ولا ساقي=إلا أنت ياللي معاليقي تمننّه
تجري بالأنفاس زفراتٍ(ن)على شهاقي=مشاعري من غرامك جا لها حنّه
تكفى تجمل وريح نبض خفاقي=ياريحة الورد مدري ريحة الجنه