أسعدكم الله
الأبيات بدون مقدمات
كان المسافة بيننا تمنع الوصل=ما ظنها تقوى لمنع اتصالك
كان اتصالك يحرجك عندي الحل=ارسل رسالة قول لي كيف حالك
ستة حروف وبعدها تضغط ارسل=وأنا عليَّ الرد ويطيب فالك
بكل الوسائل بتصل بك ولا أمل=لو كان أخصص لك قمر في مجالك
الوقت كله منك يرسل ويستقبل=يخبرك عني بكل ما هو ببالك
لا هو يجاملني ولا هو بيبخل=يقرأ هواجيسي ويقرأ خيالك
عليك من كل النواحي مفصل=كنه عشيقٍ(ن)ميتٍ(ن)في جمالك
لو تطلبينه فوق راحتك ينزل=لبى عيونك ما توخر وجا لك
بالمختصر يشبه لشاعرك يا خل=اللي هوى كلك ويعشق دلالك
قضى سنين العمر يبرا كما الظل=لا يقدر يفارق ولا يوم طالك
مفتون بك يا أغلى من الروح والكل=شفه رضاك وراحته في وصالك
ياريحة العنبر ويا ريحة الفل=عسى الهنا والخير دايم ظلالك
وختامها يا عل في وقت مقبل=يصفي زماني وأهتني في كمالك
يا سيدة كل البني حاضر وقبل=يا نادرة بين البشر في خصالك
كان المسافة بيننا تمنع الوصل=ما ظنها تقوى لمنع اتصالك