أسعدكم الله
اليكم الأبيات بدون مقدمات
الصاحب اللي صحبته وقت الفراغ=لا تعتمد فوقه ليا حدك لزوم
لا تعجبك ميلة عقاله والشماغ=عند اللوازم لو نخينه ما يقوم
لا تكسر لنفسك عليه تقول باغ=تراه ما ينفعك في شيل الهموم
وقت الله الله لن نصيته عنك راغ=روغ الحصيني من ورا رمث الحزوم
عامله بالحسنى كما طفل المراغ=لكن لا تكشف له أسرار العلوم
جمل له المنطوق تجميل الصباغ=اللي يجمل للمباني والهدوم
جادله بالحكمة ترى الحكمة دباغ=تغسل لعقل المستمع من غير لوم
وإن جادلك جاهل حذاري له تلاغ=تجهل مثل جهله ولو كان مهزوم
الحلم ثوب العقل والقوة لباغ=والذل للي يتبع لقومٍ(ن)رخوم
هذا قصيدي جالكم مني بلاغ=قلته على حسب العوايد والسلوم
الشطر الأول ينتهي قافه بأغ=والشطر الأخر ينتهي قافه بأوم
والصاحب اللي صحبته وقت الفراغ=لا تعتمد فوقه ليا حدك لزوم