أسعدكم الله أين ما كنتم
الأبيات بدون مقدمات
يا زماني علامك بعض الأيام شين=ليش نبض القلوب أحيان بتعوقها
ليه مدري علامك بالصفا ما تزين=ليه تجبر عيوني يلتهب موقها
رعتني يا زماني روعة الغافلين=الوقايد تزيد وتكبر حروقها
كن هم الليالي ساكنٍ(ن)بالوتين=المواجع بروحي وسع فتوقها
لآضوى الليل يسرى هاجسٍ(ن)ما يعين=كن كبدي هواها يقطع عروقها
يذبح الليل قلبي بالحزن والحنين=كن روحي جبال الأرض من فوقها
ينتل الصدر من قاصيه رجف الونين=قام يجمع هموم النفس ويسوقها
لا ذكرت المفاتن بالثغر والجبين=في هنوفن جذبني للهوى ذوقها
كاملة من جميعه من حلاةٍ(ن)ودين=مثل مزنة سحاب وخدها بروقها
في حياتي تفوق لكل غالي ثمين=الحلا في سوالفها ومنطوقها
غالي الروح ترخص لن طلبها الخدين=والله إني على الميثاق ما أبوقها
غالية ما تهون وشامخة ما تلين=كنها نور يسبق شمس بشروقها
حبها في فؤادي راسخٍ(ن)من سنين=اسمها زين أشعاري وطاروقها
شمعة الكون كله نور دنيا وعين=يالله إنك تعين أوفي لها حقوقها
يا زماني علامك بعض الأيام شين=ليش نبض القلوب أحيان بتعوقها