أسعدكم الله أينما كنتم
اليكم ما جادت به الليلة
الأبيات
يا حبيبي ليش تتعمد شقاي=ما كفاك البعد معلن للهجر
ياقمر ليلي ياشمسي في سماي=صرت من حبك مواصل للسهر
ليه تبخل باتصالك ياغلاي=لا سلام ولا كلام ولا خبر
أنتظر لك في صباحي وا مساي=ومن مغيب الشمس لا وقت الفجر
ودي بكلمه تخفف من عناي=لو عتاب أهون علي من الصبر
ما هقيت إنك تخيب لي رجاي=ولا هقيت إنك بتذبحني قهر
وأنت عارف علتي عندك دواي=تعرف بحالي وتدري بالخطر
لا قطعت الوصل تجلب لي غثاي=والتجاهل ياغلا طعمه أمر
ما كفاك سنين طاولني ضماي=كم شكيت وقلت لي اشرب بحر
عقب جئتك مندفع على عماي=ماشربتك يابحر مدري نهر
لا قدرت أقدم ولا أعود وراي=صرت كني جالب التمر لهجر
ما جنيت من الغرام إلا عواي=ذئب عاوي من مجاعات وفقر
اجمع الأحلام وأودعها حشاي=صار صدري للهوى مثل القبر
الحلوم كبار والواقع بلاي=ما تحقق شيء في ماض العمر
ما وفا لي بالزمان إلا رداي=ساترٍ(ن)للحال عن لوم البشر
والمواجع كلها داخل سقاي=من تجاريب الزمان اجمع عبر
يافصول العمر طاولني شتاي=الحياة دروس والدنيا ممر
يا حبيبي ليش تتعمد شقاي=ما كفاك البعد معلن للهجر