الأبيات بنفس عشق مختلف علها تروق لكم
تعاتبني وأنا اللي كل همي بالحياة رضاك=تدور لأتفه الأسباب حجة ثم ثعاتبني
خسارة ما تقدرني وأنا كلي الك وأفداك=أدور راحتك وأنته تدور وش يعذبني
أنا ما حدني للصبر غير إني بشر يهواك=لكنك مأنت ربي لأجل بالزلة تحاسبني
صحيح إني أبيك وكل ذرة بالجسد تبغاك=وكل ما فيك يا كل الغلا بلحيل معجبني
أنا مغرم بكلك ما عشقت من البني سواك=ولاني مجبرك كيفك تصدقني تكذبني
تجيني يا هلا وإن غبت عني مستحيل أنساك=ولاني من بعدك مدورٍ(ن)طبٍ(ن)يطببني
أنا جيتك بجرح ورجوتي يبرى بطب دواك=لقيت إن الجروح أرحم من علاجٍ(ن)يعصبني
شربتك كأس عشق ولا تروى خاطري من ماك=على نار التغلي صرت لك زيتٍ(ن)وتسكبني
أجيك بلهفة المشتاق يدفعني خفوقٍ(ن)جاك=وأعود بحسرتي لأني بعيد ولا مقربني
أدور بعالمك مثل النجوم بدورة الأفلااك=تبعدني ليا قربت وإن بعدت تجذبني
على درب الهوى تتبع خطاويه طريق خطاك=الى أخر عمرنا ماني مجنب لو تجنبني
أنا ماني بعاشق لك وقصدي هات والا هاك=أنا عشقي محبة طاهرة بكسبك وإكسبني
ولا جيتك بعقلٍ(ن)ناقصٍ(ن)يطلب لمد يداك=ولاني بالسفيه ولا مدور من يجربني
أنا عشقي كبير وربك اللي للفؤاد أعطاك=وعقلي قبل تطلبني على الزلة يراقبني
أبصبر للعتاب ولأني اللي بالعتب بجزاك=وبعطيك الوفاء والطيب ماتحتاج تطلبني
تعاتبني على كيفك أنا همي تراه رضاك=يجي يومٍ(ن)تعرف بغلطتك ساعة تعاتبني
التميز
الإهداءات
شربتك كأس عشق !!!
رد: شربتك كأس عشق !!!
