أسعدكم الله
مساكم شعر
يابيوت الشعر مني رسالة في قصيد=بلغي مضنون عيني تحية وإشتياق
بنك فكري من هوى الزين عامر بالرصيد=والمشاعر والهواجيس يمه في سباق
شاب راسي والأماني مثل ساع البريد=مشغلة للفكر والقلب والواقع معاق
كل يوم الحب بالقلب يزع له جديد=والظروف تكيدنا كنها حرب العراق
أتمنى شوفة الولف ودياره بعيد=المسافة كايدة والزمن زاد الوثاق
أتصبر والهوى داخلي ناره تزيد=والصبر لن طال يثقل وحمله ما يطاق
مر علقم سمم الدم في حبل الوريد=ما تعودنا للوعة هجر وإلا فراق
العمر يركض وما فات صعبٍ(ن)نستعيد=الليالي كنها راكبة صهوة براق
ما تحقق شيء من حلم بالعمر المديد=الأمل ممدود حبله ولا أدري ويش باق
سلوتي في دنيتي ونه وجر النشيد=فوق جمر الشوق ذقت العنا والقلب ذاق
يا قصيدي جاد جرحي وأنا حظي عنيد=حلو عمري بعده والبقا مر المذاق
ما تهنيت بحياتي مثل عبدالمجيد=جاد له حظه وأنا والمواجع في عناق
كل ليلة أنظم أحلام في عقدٍ(ن)فريد=والصباح أفرط لعقد المسا والصدر ضاق
لا تهنيت بحلومي ولا ميت شهيد=من سنين القلب في غفلته ما بعد فاق
يابيوت الشعر مني رسالة في قصيد=بلغي مضنون عيني تحية وإشتياق