السلام عليكم ورحمة الله وبركاته
حينما تجد ما يحرك المشاعر تتفجر ينابيع الشعر بالشاعر
واليكم هذه الأبيات كتبتها على عجل بعد أن سقاها ينبوع صافي عذب
وعلها تروق لكم ....
سبحان من صورك وأبدع جمالك=وسبحان من سخر فؤادي ليهواك
كذا يحق تسوق فوقي دلالك=وكذا يحق أعطيك قلبي ويفداك
يفداك مني كل ما هو ببالك=العمر والأنفاس تفدا محياك
من هذي اللحظة مكاني قبالك=أسبح الرحمن من حسن عيناك
حسن العذاري يا غناتي فدا لك=حطيه يا كل الغلا تحت ماطاك
أنا أشهد إنك رائعة في مجالك=الحسن كله فيك حتى بممشاك
شوفتك عندي مغنية عن سؤالك=سبحان منهو يريش العين سواك
أمام حسنك خافقي انحنى لك=بشوق وغرام وحب يازين حياك
لولا الضلوع العوج تحبسه جالك=واللي تبيه يصير لو روحه أعطاك
يطلب رضاك ويرتجي في وصالك=ما عاد له مطلوب ياكود برضاك
وإن كان شح الوصل يازين هالك=يرضيك تهلك نبض قلب(ن)تمناك!
سبحان من صورك وأبدع جمالك=وسبحان من سخر فؤادي ليهواك