مساكم الله بالخير في كل مكان وزمان
اليكم ما جاد به المساء
الأبيات مثل ما جات بدون مقدمات
حبيبي عيوني رمشها من سنين يرف=متى يا حبيبي تكحل بشوفتك عيني
ذبحني حنين الشوق عقب لجسمي نحف=ونار الهوى في داخل القلب تكويني
من الحب عقلي بعد ثقل ورزانة خف=على طيفكم مع كل فكرة يوديني
هواكم لقلبي مثل كهرب لدقة سلف=ليا لفه التفكير بيح مكانيني
نحرني غرامك دم قلبي بعد ما جف=نزيف الهوى غرق جميع الشراييني
نسف حبكم كل العذارى بقلبي نسف=ولا باقي إلا أنت يا كامل الزيني
ليا زارني طيفك يسبب لقلبي رجف=تشب المشاعر نارها بالضلاعيني
تصبرت لين الصبر صابه كمايه ضعف=بعد حالت الأحوال ما بينك وبيني
اسوق العمر قدام والحظ يرجع بعمري خلف=لك الله مدري وين حظي بيرميني
على النار وإلا بجنتك يا غضي الطرف=على كل حال الحب بالروح باليني
ما دام الهوى تستاهله يالغضي الترف=بصارع هواكم لين في يوم يفنيني
على قولهم مليوع يصفق بكف لكف=عسى الله على بلوى المواجع يقويني
ظروف الزمان الشين قشرا ولا تندف=وبُعد المسافة زادت البلة بطيني
يا عل الليالي بعد قفت بخير تلف=تقرب حبيبٍ(ن)ناد وأجيه ويجيني
حبيبي عيوني رمشها من سنين يرف=متى يا حبيبي تكحل بشوفتك عيني