قرأت ببعض المواقع إن المملكة بتسوي ربط للتيار الكهربائي
الى أوربا عبر تركيا لوجود طاقة فائضة بحكم انها بلد منعم الله عليه بالشمس
وبيسووا مفاعلات نووية لتوليد الطاقة بالربع الخالي
بالوقت الذي يعيش 3 ارباع المواطنين بدون كهرباء ورفع الأسعار على من لديه كهرباء
تناقضات عجيبة عجز بميزانية الشركة وفائض بالكهرباء ومنع ادخال التيار للمواطنين
او رفع الأسعار في ضوء هذه التناقضات كتبت هالابيات المتناقضة ايضا فقد تعودنا على التناقض في كل شيء
أنا سمعت بنشرة الأخبار=خبر يقولون العرب مدروس
المملكة بتصدر التيار=والشعب ثلثينه على الفانوس
والكهربة بتعلي الأسعار=لأجل تغطي عجزها المدسوس
على السعودي ترفع المعيار=وتخفض التيار للمجوس
الى متى ياشعبنا صبار=تعيش في بوسٍ(ن)وتجني بوس
ضحيةٍ(ن)للفقر والتجار=تحت المواطي بالقدم مديوس
الأسم ياكبره وفعل صغار=الحب مطحونٍ(ن)وفيه السوس
كل الهدف للمدح والإشهار=لاعدت ياحظٍ(ن)غدا منحوس
الجار ما يعرف بداني جار=كلٍ(ن)بهمه والجفا مغموس
والحبل ماشي في يد الجرار=والقطر من رب البشر محبوس
ما عاد تقدح بالمواقد نار=والمقبلات من الليال تعوس
ومن لا يحسب للزمن دوار=لو طالت الشدة تعيش نفوس
الله يفرجها على الأحرار=اللي جبرها الوقت تبلع موس
تحيا قلوبٍ(ن)غطيت بغبار=تأخذ من الدنيا عبر و دروس
المملكة متى تصير أنهار=الا ليا كسب الشعب ناموس
وإن كان بقي الذل والإنكار=ما والله تعز الرجال فلوس
وش تنفع الدنيا بدون أخيار=ليا صار عقل أهل العقل ملحوس
يالله ياعالم بعلمٍ(ن)صار=إنك تعدل حظنا المنكوس
المملكة دارٍ(ن)وأعز ديار=دار الرسول وبيتك المحروس
حتى لو إن الجو فيها حار=والكهربة تصل لحد الروس
ما والله نبدل عهود أبرار=لو الشجاري والكبود يبوس
اليابسة من حقها المنشار=والمثمرة تكسي عري بلبوس