يا عين كنك للمشاعر بتقرين=وأرسلتي الهمال تغرق غشونه
إن كان يا عيني من البعد تبكين=على الذي طول المسافات دونه
عز الله لتبطين تبطين تبطين=ما جف دمعك والعيون محزونه
تبطين ما شفتي قدوم البعيدين=اللي لهم رمشك تهامل مزونه
ليت العباير من فرح به تهلين=لكن دمعك من غبون مخزونه
هلي لدمعك لين يفنى وتفنين=سود الليالي ما طرفها مرونه
في باطني يا عين مثل السكاكين=تقطع عروق القلب داخل سجونه
عوجٍ(ن)تحنت من غرام المحبين=اللي لهم فكري تصارع ظنونه
الصاحب اللي يا عيوني تودين=مدري متى نونك يناظر عيونه
الحظ مقفي والأماني محازين=قل الصبر والعقل زادت جنونه
العمر ضاع ولا بقي بالعمر لين=أعمارنا ما عاد فيها ليونه
الزين راح ومابقي من عمر شين=عقب المعزة حان وقت المهونه
لعبت بي الأحلام وأقفت مع الزين=ما باقي إلا ذكريات مغبونه
سويت فيها من قصيدي دواوين=قصيدي اللي مبكيات ٍ(ن)لحونه
القاف كنه من حميم البراكين=من واهج ٍ(ن)بالجوف ناظم شجونه
نار ٍ(ن)بقلبي تشتعل عدة سنين=من بعد من هو ساحرتني فنونه
يا عين كنك للمشاعر بتقرين=وأرسلتي الهمال تغرق غشونه