دقات قلبي زايده في عددها=مهي طبيعية ولاني طبيعي
في داخلي أحس رجفة رعدها=مدري سحائب صيف والا ربيعي
من يوم شفت اللي تلوح بيدها=لوح لها قلبي بخفق(ن)سريعي
تلويحة مرت وفكري رصدها=كني بعدها فوق شوك النقيعي
أخاف لا يكون الغضي ماقصدها=والا تخيل له مقام(ن)رفيعي
هذي بدايتها وماهو بعدها=ماصرت أميز جدتي من رجيعي
من بعدها والروح زايد لهدها=أحس في نفسي صراع(ن)فظيعي
القلب عشمني بصافي شهدها=والفكر يشري في هواه ويبيعي
لولا ضلوعي تمنعه هو عمدها=وأنا لحكمه غصب عني بطيعي
محتار وين الروح تلقى سعدها=لا قادر(ن)يكتم ولا هو يذيعي
سحابة(ن)مرت غزير(ن)بردها=وأنا سمايم صيف والع وليعي
مرت علي مروحه يم بلدها=ما تسقي العطشان يقرع قريعي
قفت وأنا قفيت محد(ن)نشدها=تحلم وأنا بحلم فضانا وسيعي
ليت العواصف يم داري تردها=يمكن تهل ثعول وأشرب وقيعي
تسقي حنايا أضلعي من وجدها=تنبت زهوري بعد كانت قشيعي
هذا قصيدي مرسله في طردها=لعلها تسمعه يغدي شفيعي