ليلة البارحة سهران ما فيَّ نوم=
اصبح الصبح عيني ما غشاها منام=
طول ليلي رهين علوم وأطرد علوم=
تال شعبان قبل يحل شهر الصيام=
اتقلب سواة اللي تعاطى سموم=
بين شعرٍ(ن)حلال وبين شعرٍ(ن)حرام=
يا قصيدي تجمل سد عني لزوم=
لا تفشل هجوسي من ردي الكلام=
هات لي ما يجمل عند راعي سلوم=
وهات لي ما يجمل عند راعي غرام=
بشر الأولي بالخير خله يصوم=
وقول للي يبي عذب القصائد سلام=
وإن تكرم ورحب جعل عزه يدوم=
يمكن العين ترقد بعد طول السقام=
وإن تهنيت فالمرقد بوردي حلوم=
صرت عقب السهر كلي على مايرام=
يا ونيس المشاعر كل ليلة ويوم=
ما تفارق خيالي يا غصين البشام=
كن طيفك مسوي فوق فكري غيوم=
يامزون الجمال ويا هتون الغمام=
وكن مركب وجودي في بحورك يعوم=
وكن ذاتك حياة بدونك اغدي حطام=
يانصيبي بذا الدنيا يا حلو الرسوم=
الله إنه لا يحرمني وجودك وسام=
أنت حظي مكفي عن جميع القسوم=
وأنت حلم ٍ(ن)حلمته بالوفا والتمام=
الزمن ما يجامل والأماني تحوم=
والعطايا ثقيلة غير عند الكرام=
وأنت تدري عطيتك خافقي ومحشوم=
يا ملاك الفؤاد ويازعيم الحشام=
ذا قصيدي كتبته فيك حبة خشوم=
ومنتظر وش جوابك يا فراخ الحمام=
ليلة البارحة سهران ما فيَّ نوم=
اصبح الصبح عيني ما غشاها منام=