يا طيف ياللي تضحكني وتبكيني=وش ذا السوايا ياطيف اللي تسويها
ياطيف لا ويش بالأشواق تكويني=نار الهوى بالحنايا من يطفيها
ذكرتني بالغلا والبعد حاديني=أدميت عين الغرام اللي مبكيها
أنا احسب إنك من جروحي تداويني=ما كنت أظنك جروح الشوق تدميها
كأس ٍ(ن)شربته من الأشواق مرويني=من كف معشوقة ٍ(ن)عشقي مسميها
ما عدت يا طيفها عنها تسليني=الروح يا طيف صعب الحلم يرضيها
ياطيف ما بي من الأشواق مكفيني=ما عادني حمل لأحلام ٍ(ن)مسريها
حلم الهوى مستحل القلب لسنيني=والروح عجزت تحقق حلم مشقيها
ياطيف شوف السهر وسف على عيني=أعوام اساهرك مدري ويش تاليها
كم لك سنة وأنت بالسيرة مخاويني=تدري بروحي وغاليها ومغليها
اللي أريده ظروفه بينه وبيني=الحظ عيا يجيب اللي مهاويها
عيا يجيب الغلا وإلا يوديني=ظروفنا حظنا عيا يسويها
ما نلت غير السهر من عشق مشقيني=وأحلام أمني لروحي في حراويها
كتبتها بالقصايد في دواويني=حلت لحون القصايد مع قوافيها
يا طيف ياللي تضحكني وتبكيني=وش ذا السوايا ياطيف اللي تسويها