يا مشعلة جمرتك خلف الضلوع الصخاف=خافي من الله ضلوعي ما تحمل جمر
لا تحرقين المشاعر والعروق الضعاف=سواة ما احرق عيوني في رجاك السهر
إن ذاب قلبي وعقلي والضلوع النحاف=اقري علي التحايا في وداع العمر
صبرت عدة سنين وصاب صبري خلاف=وشلون بلقى صبر من عقب قل الصبر
في داخل القلب لوعة صابته بإرتجاف=واللي قي من عمر محفوف بأشنع خطر
أحسن ليالي زماني يا رجايه خلاف=وأتعس ليالي زماني مالها من قمر
يا زهرة أحلام عمري حان وقت الجفاف=مشاعر الشوق صارت مثل هشم الشجر
ولى زمان الزراعة والحصد والقطاف=أيام عمري تساقط مثل ورْق وزهر
وشلون تحيا بلا سقيا يا عذب الرهاف=لا صار ما هل وبلك يا مزون المطر
أيام وسنين عايش في حدود الكفاف=لا بالله إلا وربك تحت خط الفقر
لأجلك ياست المشاعر مهتوي للعفاف=حيثك بعيني وقلبي غير كل البشر
فيك الحسن والأدب والذوق رسمه يشاف=يا بسمة شفاه عاشق من هواك انصهر
طيفك يسامر حلومي بين فرش ولحاف=وليا طربت لمسامر طاب معه السمر
وأذكرك لو طفت بالكعبة بوقت الطواف=وأذكرك لو عانقت كفي لركن الحجر
وذكرك بالجو وإلا تحت حد الرهاف=ما كنك إلا خفوقٍ(ن) بين صدر وظهر
تدرين من ويش يا بعد المحبين أخاف=أخاف عمري يروح ولا يجي لك خبر
لكن لن رحت وإلا صار ما لا يشاف=لا تشتكي من فراقي واقتنع بالقدر
يا مشعلة جمرتك خلف الضلوع الصخاف=خافي من الله ضلوعي ما تحمل جمر