أسعدكم الله
الأبيات بدون مقدمات
...............................
كل ما شفت لي بارق بنوه ينوض=قلت خد الغضي مدري عيون الغضي
أذكر اللي عشقته والمحبة حظوظ=جامعٍ(ن)كل غاياتي ومنه مرضي
ما عشقته ديون ولا خذيته قروض=بنك عشقي لخلي ممتلي ما فضي
داخل القلب حبه واحد من الفروض=يصرف القلب حبه لين خلي رضي
مير طول المسافة روضتني بروض=بعدها يكسر لقلبي وزاده شظي
المشاعر تعاوى في فؤاد مخضوض=والأماني بنار الشوق ما تنضي
يالله إنك تقويني لصبري تعوض=قادر تقربه قـدام لا أغمضـي
لو بغيت النهوض البعد يحدا النهوض=مير يا هاجسي بالشعر قوم إنهضي
قوم بكتب قصيدي فيه لحن وعروض=دام قلبي حكم له حكم ما ينقضي
ماني بطاعن بحكمه وعارض نقوض=غايتي في رضاه وبالغرام غرضي
فوق عندي مقامه ما نزل للخفوض=قابل بكل شيءٍ(ن)ياخذ ويرفضي
بعده البيض عندي ما تساوي بعوض=هو حبيبي طبيبي يأمر ويفرضي
قابل اللي يريده لو غشاه الغموض=أنتظر جود وصله يمنع ويعرضي
دام راسي سليم ولا غزته الرضوض=بعشقه لين عمري ما بقى ينقضي
مايغير فؤادي والمشاعر عروض=خافقي في غرامه عاشق مروضي
كل ما شفت لي بارق بنوه ينوض=قلت خد الغضي مدري عيون الغضي