يسرني أن أطرح بين أيديكم هذه التخاريف الشعرية
وأود التنويه إلى أن الأسم الوارد بالقصيدة رمزي لتوافقه مع القافية
لا أكثر ولا احد يسي الظن خصوصا لو صادف توافقه مع أعضاء المنتدى
الأبيات
يا عذب اللما مفهو ما تفعله مفهوم=تمنى تنافس بالحلا ناس مشـهوره
تغير لصورة صفحتك بين يوم ويوم=ولا كل صورة بالحلا تشبه الصوره
لكن سو ما بدك وأنا قول لك محشوم=ترى ما دهشني بالحلا كل سنيوره
أنا ما لقيت أحلى من اللي منه محروم=قليلٍ(ن)من الزينات تشبه حلا نوره
لكن روحت صار الوصل بيننا معدوم=ولا باقي إلا حسرةٍ(ن)بي مغموره
أخذها زماني مالنا باللقا مطعوم=ظروف الزمن تحكم والأرواح معذوره
بنادم ترى ماهو برايح عن المقسوم=الأرزاق والأعمار باللوح مسطوره
محالٍ(ن)على ما قيل حالٍ(ن)بحال يدوم=تدور الليالي دورةٍ(ن)من ورا دوره
يقولون بالأمثال فعل الحظوظ سهوم=وأنا أقول حنا والزمن لاعب وكوره
تمر الليالي شايله بالكفوف حلوم=تخادع مشاعرنا والأيام مذكوره
تقلب كما الحربا هنا تغسله بهموم=ولا نجني إلا قلوب بالجوف مكسوره
تون القلوب من القسا بالهموم تعوم=فروح الزمن صارت شحيحة ومحظوره
تعكر مزاج أحلامنا والكبود تسوم=من حظوظنا اللي طايحاتٍ(ن)ومعثوره
زمان التصافي مات ياقلبي المكلوم=ولا باقي إلا وجعته فيك محفوره
زماني عوين الحظ ظالم وأنا مظلوم=أخذ فرحتي وأقفى والأحلام مقهوره
شموس الأماني حال من دونهن غيوم=وأنا ديرتي بالجوف بالقهر ممطوره
ختام القصيدة يا هوى بالحشا مرحوم=أمانيك جوف الصدر حية ومقبوره
عليها غبار الصد ببعادنا مردوم=وصفحة خفوق الروح للهم سبوره
سواليف نكتبها والأخرى بنقش رسوم=تخالج مشاعر بالمعاناة مخموره
حكاياتنا ثلثينها ما طلع مفهوم=عجزنا ننافس بالغلا ناس مشهوره