الأبيات بدون مقدمات
يا صاحبي حمستني بالهجر حمس=احرقتني سواة حرق السجاره
الغيرة اللي عذبت غالي النفس=سوت لها بين الضلوع إنكساره
ما تدري إني فيك مجنون بي مس=مالي علاج إلا أنت لوهي زياره
تكسب بها ثواب وتزيح للبس=اللي معقب بالحنايا كداره
من بعدك وغيرتك ومعاتب إندس=جوف المشاعر بين تارة وتاره
بين الرجا واليأس والزين والغلس=إنهد حيلي مثل برج التجاره
نشفت دمي والعظم فاقد الكلس=محال تبرا والشكاوي مثاره
من حبك اللي داخلي دايم يعس=والحر قالوا يفتهم بالأشاره
ليت الزمان يجود لي ساعة وبس=أعيشها وإياك ساعة طهاره
قدام حلو الحب يذهب كما الأمس=وقلوبنا تغدي سواة المغاره
الحق علي لحب ما عاشته إنس=هواك مأخذ بالخفوق الصداره
حبك سواة الجمر واحر من شمس=يا مشبهن للشمس لون وحراره
غمستني بالشوق يا فاتني غمس=واحرمت عيني نومها يا خساره
منعت عني حلو ريحتك والهمس=تصرفك غريب ماهي شطاره
ما عاد ينفع فيك صوتٍ(ن)ولا لمس=بعد الحلا ذوقتني للمراره
لكن خلاص انا تعلمت للدرس=اسدلت من دون الحلوم الستاره
ماضي غرامك منغرس داخلي غرس=بنيت له بيني الحنايا سفاره
مير البلا مشاعرك صايره خرس=اقست لقلبك صار مثل الحجاره
ما عدت مثل أول تمنى ولا تحس=غرك زمانك والزمان استداره
بكره يجي لك بالهموم متنكس=لا من فقدت لحسن عود ونظاره
النار ترجع ماش لن جمرها هس=تبدأ شرارة ثم ترجع شراره
سواة حظي معك من نحس في نحس=ضيعك مني وإكتفى بالنذاره
أتعب لروحي للمتاعب يكدس=على الفؤاد اللي مجود وقاره
ما راح يتبع ناقل الحكي والهلس=النفس عن كل الدنايا مجاره
شامخ شموخ طويق في يوم ماخس=الضلع ما يسحبه خيط الدباره
وختامها يالله يا فارض الخمس=تلطف بحالي والنهاية مزاره
نظم القصيد أحيان ممشاه بالعكس=محدٍ(ن)يحقق من قصيده لأماره
الشعر نزف شعور تخمين في هجس=كل ما كسب غارة يجهز لغاره
أمر من حنظل وحاليه من دبس=يسكب مثل سكب العسل بالغضاره
يا صاحبي حمستني بالهجر حمس=احرقتني سواة حرق السجاره