أسعدكم الله
الأبيات كالعادة اطرحها بدون مقدمات
علها تروق لكم
البارح الهوجاس سبب لي صداع=أفكار تجمح مثل جمح الطرايد
طير الهوى بالقلب ماخذه ميقاع=غرد بقلبٍ(ن)عاشقٍ(ن)للفرايد
ياطير كافي خافقي قطع قطاع=قد أيش بتزيد الشدايد شدايد
خلاص يا طير الهوى حلمنا ضاع=حال القدر ما بيننا والوكايد
الشوق ناره واقدة خلف الأضلاع=والهجر بنزينٍ(ن)يزيد الوقايد
أقضي نهاري ضايق الصدر ملتاع=والليل راسي ما هوى للوسايد
الفكر طول الليل شاري وبياع=أحلام ليلٍ(ن)ما تحقق عوايد
أون ون اللي دخل قلبه أوجاع=كله من اللي لابسات القلايد
قلبي لهن عاشق وطايع ومنصاع=ما جاب لي طول الليالي فوايد
أركض معه ركيض مفلس وطماع=كل ما خسر جولة دخل في جدايد
وأنا أدري إنه خاسرٍ(ن)كل الأوضاع=من كثر ما يجلب عليّ النكايد
لكن خلاص الدرب ما عنه مرجاع=بمشي معه سيان قرب وبعايد
ما عاد يفرق بالعنا طول مطلاع=دام الطريق من أوله صعب كايد
هذا قدر شاعر تعلا عن القاع=سما بشعره عن جميع النقايد
الطبع يغلب للتتطبع والأطباع=من دون شكٍ(ن)ما تسمى عوايد
البارح الهوجاس سبب لي صداع=أفكار تجمح مثل جمح الطرايد