الأبيات بدون مقدمات
تقول اعقل وهي من سببت لي خلةٍ(ن)وجنون=بعد ما سيطرت فوق الفكر جيه تقول اعقل
أنا يابنت قبل أعرفك كنت العاقل المتقون=لكني بعد ما شفتك غديت من الهبال اهبل
تعالي عالجي عقلي وكلي والجميل يمون=وردي عقلي اللي ضاع سبة رمشٍ(ن)مسبل
غدا من نظرة عيونك فداك العقل يالمزيون=إذا عندك دواه أسرع وهاته والوقار أفضل
عيونك ضيعتني لين صرت العاشق المفتون=ما عاد يروق لي الا سحر بعيونك النجل
ذبحتيني بنظراتٍ(ن)لها خلف الضلوع طعون=وبسماتٍ(ن)تدف القلب صوب الموت ما يسأل
أعانق طيفك الزاير وأسامر حلمي المرهون=بسحرك والمشاعر تنتظر من عالمك أجمل
أناجي فكرك الشارد لعله يرحم المغبون=من بعادك يعاني لوعةٍ(ن)بالروح متبهذل
يصيح الشوق في جوفي ويبقى بالصدر مدفون=تحت حدب الضلوع وصرخته بأفكاري تجلجل
نقشت أوجاع حبي فوق شعرٍ(ن)وضح المضمون=يدور للرضا عندك ولا يرتاح لو تزعل
ياكيف أعقل وأنا اللي صرت لك أطوع من المسجون=وأذل من الأسير اللي وقع بالأسر وش يعمل