أسعد الله أوقاتكم
الأبيات بدون مقدمات
تقول إنسى وهي قبلي تسابقني على النسيان=غريبة كيف تطلب مني أنسى عينها النعسا
يابنت الود والإحساس الى منه ملك لإنسان=صعيب إنه على حسب الطلب للي يبا ينسى
أنا كنت أحسب إن البعد علة قلبي الولهان=لقيت إن القساوة فيك علة ثانية وأقسى
يهون أنزل على رغبتك وأهجر غالي الأوطان=لكن أنسى غرامي ياغرامي خالف الحدسا
تطمن كل ماهو صار لاذ بطية الكتمان=لكنه باقيٍ(ن)بالروح تشعر فيه وتحسا
تمر أزمان عقب أزمان ما غير غلاك أزمان=طيوفك كل يوم تزورني وأحلامي المرسى
يكفيني ليا سافرت ذكرى للوفا عنوان=عليها إسمك مع إسمي والجفا يا فاتني يخسا
أسامر ذكرياتي كل ما هز الخفوق جنان=وأعلم مقبل أيامي من اللي صار لي درسا
سجلاتي معك تاريخ لا تمسحه مهما كان=وأنا باقي على عهد الوفا لو حدني نحسا
أقول أذكر ولا تنسى هوانا عوذ الشيطان=تعال إغرس بقايا الحسن داخل خافقي غرسا
لعل الله يفرجها يزين الحظ مهما شان=ونكسر عن مشاعرنا قيود الضيم والحبسا
أنا لو كنت بايع بعت قبل تقول لي يافلان=لكني شاري الغالي ولا أبيع الغلا بخسا
أبصبر وأتصبر لين يفرج همي الرحمن=عسى ربي يشافي جرح يفرس بالحشا فرسا
دواها شوفتك ياللي تشجعني على النسيان=غريبة كيف تطلب مني أنسى عينك النعسا