غابت شهور وجات وتقول وشلون=وشلون حالك بعدنا والعزيمه
قلت:الصحيح الحال من دون في دون=ما صارت أيام الزمن مستقيمه
قالت:كذا الدنيا معاناة وحزون=متقلبة ما بين عدل وظليمه
تدبير رب الكون بالناس والكون=أيام فيها بخل وأخرى كريمه
قلت:السنين تمر والناس يفنون==وشرجعك بعد الهجر يا فهيمه
قالت:بجدد شوق بالقلب مدفون=رجعت أجدد ذكرياتٍ(ن)قديمه
عادت ورحب خافقي الف مليون=يامرحبا واهلين حب وحشيمه
من بعدها يا عذب الأنفاس ممنون=جيتك من بعد المغيبة غنيمه
خفت جروحٍ(ن)من مغيبتك وغبون=عاد التعافي في عروق(ن)سقيمه
أنعشت قلبي يا عسى البيض يفدون=كلك على بعضك دلالٍ(ن)وشيمه
شرحت صدري يا بعد كل مزيون=حلو اتصالك رحمةٍ(ن)يارحيمه
ياللي غلاها داخل الروح مضمون=ما غطته سود الليال المقيمه
هويتها والناس ماهم بيدرون=إن الغلا لإحساس روحي نديمه
بين الحنايا حبها دوم مصيون=مصيون عن قوم الحكي والنميمه
غرامها ما عشت باقي ولا يهون=يكبر غلاها والنوايا سليمه
غطيتها بالرمش وفراشها النون=ضيفتها حلو المشاعر وليمه
أنا وشعري فيه فاتن ومفتون=راق المزاج وقافي الغيث ديمه
من فيض قلبٍ(ن)للغلا دوم مرهون=يهطل محبة والطواريق غيمه
هديته مني تراحيب ولحون=إسمه ورسمه فوق شعري وسيمه
غابت شهور وجات وتقول وشلون=وشلون حالك بعدنا والعزيمه