الصدر ضايق فارقته السماحه=الى متى يا صدر باقي تعلم
كنت اعتقد بالحب للصدر راحه=ماكنت أظنه قطعة من جهنم
حتى وقعت وطحت به حي طاحه=عرفت منها ويش معنى تألم
صدر المولع مايعرف انشراحه=إيون صاحي وان رقد به تحلم
أثر الهوى للفكر كله فداحه=إن بحت به والا عليه اتكتم
القلب ما يرحمه كان إستباحه=اليا تمكن من عروشه تحطم
ماينقذه بالطب مشرط جراحه=وش يجمع اشتاته الى من تقسم
ما عاد يجدي فيه واعظ نصاحه=ولا عاد يعدل فيه قاضي تظلم
ماله علاج الا حسين الملاحه=ينسى مواجيعه الى من تبسم
لا من قرب هم الزمن منه زاحه=ولا من بعد كل الأماني تهدم
اللي شرب سم وعسل من قداحه=هذا الوحيد اللي بنبضه تحكم
شهد العذوبه والحسن والصراحه=وسم البعاد اللي غلب للتسمم
اللي تركني للمواجيع ساحه=اطلق هواجيس الهوى فيه واخم
مالي معين إلا لسان الفصاحه=الوذ به في ساعة الضيق والهم
يرمي على وجه القوافي وشاحه=ويغوص بي ببحورها داخل اليم
أترك هماجه وأرتوي من قراحه=بعذب المعاني يالساني تكلم
ماني بمن يطرب لشعر الوقاحه=ولاني براسٍ(ن)بالهزيله تعمم
لو ضاق صدري ماتضيق السماحه=علمت غيري بالزمن وأتعلم