في طقة الباب يفرح قلبي وعيني=أركض عليه أحسبك يابوي طقيته
خمسة عشر عام تاركني وناسيني=يا كبر ذنبك على بنتك وسويته
أنا ضحية زعل ما بين قلبيني=تفرقوا والثمن بالعمر لا قيته
من صغرتي كنت أضنك فرحة سنيني=مير الله أقوى على اللي منك عانيته
طول الدهر عفتني واليوم ترجيني=عشان طاري المهر ياشين ما جيته
ويلي من الناس ما خلو حكي فيني=وهذا أنت يا بوي عكس اللي تمنيته
أبيك ضد الزمن ساعة يبكيني =وأبيك تمسح سحايب دمع هليته
وإذا مرضت يا بيي توديني=تشوف وش عليتي من وضع قاسيته
تشتري لعبه يا يبه فيها تسليني=تاخذ بعضها وأنا آخذ منك ما أعطيته
في ليلة العيد ما ألقى من يهنيني =الا أمي اللي تحس بهم أحفيته
يا بوي نظرة غلا ما هيب ترويني=أن حصل بالعمر قربك وحسيته
لو ني يتيمه لقيت اللي يعزيني=وأنساك يا من ضويت الشمع وأطفيته
مصيبة أني ثمر قلبك وترميني=في ظل رحمة غريب صرت في بيته