ألا يا يارفيقي يوم تنشد عن الأمجاد=كثيــرة لكن الوقــت قـــرب يضيعهــا

وأنا وأنت لو سرنا على سيرة الأجداد=وذيك العلوم اللي مع الناس نسمعها

فما هـذه حالتـك ترمي بك الأضـداد=ومجبـور غصـبٍ عنك ترضـخ وتتبعهـا

تركنـا سيرهـم وانشغلنــا مع الأولاد=تبعنــا ســوالف ما قدرنـــا نطبعهـــا

تغـربت وأنــا غربتي قســوة وعنــاد=بلايــه همــوم داخـل القلب أصارعهـا

وأنا غربتي يا صاحب من أول الميلاد=وأشـوف الزمن كبـر جروحي ووسعهـا

أشوف الخطأ وأعرفـه لكني علي قيــاد=ليا جـد وحدة طـاحت النـاس بأربعهـا

أنـا يـا رفيقـي لست عنتـر ولد شـداد=ولا ني صـلاح الدين الأخصـام يفجعهــا

ولاني بمفتي للشريعــة وأجيز جهـاد=وأصنف خطايــا النـاس وإلا مشرعهــــا

ولاني بحاكم يحرسـه بالجنود أعداد...ولاني بســلطــان الجزيــرة وتوابعهــا

ولاني بقائــد للحــرس عندي الأفــراد=على شــان تـال الليل أبــدا أوزعهــــا

أنـا يـا رفيقي واحـد من رجـال أجـواد=أنـا ودي إن النـاس تعـرف منافعهـــا

مصـائب كبيـرة والزمن قـادم بجـداد=.يخطــط لهـا الكفـار يا اللـــه تقلعهــــا

وحنا سـواة النمل وأكثـر من الجــراد=لكن الأصابـــع بالنصـر كيف نرفعهــا

غزونـــا عدانـا بالحيـل بين نقـص وزاد=وصـارت مشـاكل بيننــا من يوزعهــا

بعينك تشـوف أفعالنا معلنـة لأشـهاد=على كل محفــل بالأيــادي تفرعهـــــا

ليا دبت الفرقــة غـدا كل شيء وبـــاد=مكايــد جديـدة كيـف نقـدر نقارعهــا

وأنـا أظـن هـذا طبعنـا من ثمود وعـاد=نطــش المســابح ماقدرنا نجمعهــا

وتبقى حيـاة البـدو تشبه لقــدح زنــــاد=نطفي ثـلاث وعشــر نبــدأ نفرقعهـــا

وحنا لحانــا كلهـــا بقبضـــة الحـــداد=نعـــز أللحـــى وإلا نكبــه ينزعهـــــا

تأمل بعينك شـوف وش صائر لبغـداد=سنين طويلة ما بـرت من مواجعهـــا

عسى راعـة الكابوس للعُـرب ما ينعـاد=بعد جفـت البركــة وبانـت ضفادعهــا

وناظر بعينك كيف صارت بنات الضـاد=تهاجـر جفـا مطـرودة من مرابعهــــا

تغـادر بحكـم الظلـم والجـور والإبعـــاد=بعــد ما لقـت بديارهـا من يدلعهــــا

عيونك تشوف السوط يضرب به الجـلاد=ونــار تشـــب وحولهــا من يولعهــا

نبا نشرب الكأس اللعينة من الأوغـــاد=.فمـا شــربته بغــداد لا بـد نبلعهــــا

وفكــر بعقلك كيف فـارس بني عيّـــاد=طـوى صفحـة التـاريخ قفــا وودعهــا

تأمل بفكرك شوف وش تتـرك الأحقـاد=خـراب الديـار وحرقة من مواجعهـا

وذا الحين جاي تقول يأتي بعدنا أحفاد=تعـز الديار وتختلـص في مجازعهــا

حشـا يا رفيقي ذا الــزمن فطـر الأكبـــاد=تُربـى كما كنـا على ديس مرضعهــا

ويمكن يجي أخس في قادم الإمداد=.يبني كنـائس والمسـاجد يشمعهــا

وأنـا يـا رفيقي كل خـوفي من الإلحـــاد=وهذا الشباب اللي خصومه يطاوعهـا

فتـن بالزمن ياكثــرها شــبت الوقـاد=لعل الكــريم بعزتــه عجـل يرفعهـــا

ألا يا يوم تنشد عن الأمجـاد=كثيــرة لكن الوقــت قــرب يضيعهـا