القوافل العربية - عمشا بنت عماش....؟؟؟؟؟

وش عاد باقي بس ياطاش ماطاش = وحنّا ندوّر شيّ مايفسد الذوق

حتّى ابتلشنا بعدك ابْبنت عمّاش = اللي لها منطوق ماهوب منطوق

ايقودها فكر المهبّل والاوباش = اللي تبا مرزوقه تصير مرزوق

جتنا على الشاشه بعد تُلّ وقماش = تلبس شماغ رجال وعقالها فوق

وتحكيلنا من منطلق رابطة جاش = وتْقول مِن حقّ المره لازم تسوق

والاّ منين البنت تاكل وتعتاش = دام الشنب فالسوق محتكرٍ السوق

في مجتمع يظلم طويلات الارماش= وفيه المره مخلوق ماهيب مخلوق

وهذي خلاصة تجربة فكر حشّاش = وعمشا غَدَت لقليّل المعرفه بوق

لكنّ ياعمشا بعد خاطري شاش = باسمّعك طاروق عن كل طاروق

أنتي تجرّيْتي وللنقش نقّاش = حتى طرقتي شيّ ماهوب مطروق

ومادام نِشْتي شيّ ماكان ينّاش = وجيتي بثوبٍ كلّه فتوق وشقوق

يابنت دون العِرْض فالهوش هوّاش = ومن يعترضنا ياخذ الطاق مطبوق

وبناتنا ماحاشِهِن كل حوّاش = لو حاول لْتغريبهنْ كل مطفوق

هنّ البني ستر العبي أبيض الشاش = وهنَّ الحيا والستر عاشق ومعشوق

ماغشّهِنِّ بْضحكة السن غشّاش = ولاحدّهنْ عن دربهِن حادي النوق

الدين منهجهنْ وبِقْلوبهنْ عاش = ولاضاعت الْهِنْ عِند اهاليهِن حْقوق

ولعيونهِنِّ عْيوننا لحاف وفراش = وِلْحبّهِنْ بِقْلوبنا صرح مرموق

واليا انتخنّا نَبْطش بكل بطّاش = ونَدْرى عليهنْ نسمةٍ تجرح الموق

هذي الحقيقه كاش من راعي الكاش = والعلم جاك ومصدر العلم موثوق

ودامك تجرّيْتي بعد طاش ماطاش = وجيتي بثوبٍ كلّه فتوق وشقوق

روحي مراح مقيط يابوق الاوباش = اللي تبا مرزوقه تصير مرزوق

للشاعر : محمد دخيل القثامي
منقول