قالت:أنته زعلت وقلت:جاك الخبر=من سنينٍ(ن)طوال الحظ معلن عقوق
الزعل من زماني يا طويلة عمر=يوم حظي منعني عنك صرت محروق
كم سنة يا مناتي رفقتي للسهر=اتقلب على الجنبين والنوم عوق
امس واليوم والبارح منامي كدر=في هجوسي رعود وفي عيوني بروق
ما نفعني علاج ولا نفعني صبر=علتي ذكرياتٍ(ن)قاطنة بالخفوق
كل ما مرت الهاجوس حين أفتكر=يشتعل من سببها دم جوف العروق
قالت:الحال من بعضه بحل وسفر=الزعل يا غناتي فوقنا ما يلوق
إن شكينا مصيبة وإن سكتنا قهر=ما يعرف المواجع غير منهو يذوق
مير وش حيلتي وإياك حكم القدر=مالنا فيه قدرة قد نفذ يا صدوق
قلت:هذا بلايه كان عندك نظر=حظنا يا غرامي صلف ماهو شفوق
الليالي تمر ومسرعة بالممر=ما خذينا حقوق ولا عطينا حقوق
كل ليلة وأنا والطيف نكتب شعر=يشتكي من غرامي وأشتكي منه شوق
من صلاة العشاء حتى صلاة الفجر=متعبين القوافي مسهرين الطروق
قالت:أجل رضيت وقلت: كلا قمر=كيف يرضا فؤادي وأنت مبعد يا ذوق؟
قالت:أنا زعلت وقلت:عندي خبر=من سنينٍ(ن)طوال الحظ معلن عقوق