ما عاد انا واياك يا ناعس الطرف=تباعدت أحلامنا والزمن شان
ما عاد لي بالود وملاحقه شف=تعبت من تبع الهوى طول الأزمان
ولى زمان مواعدٍ(ن)فيه مع صدف=واللي من أول زين سرعان ما هان
ياللي تعرض الزين بغطايتك لف=ما عاد أنا واياه لو كان ماكان
ما عاد تغريني نقوشك على الكف=ولا عاد تجذبني مداعيج الأعيان
طف الشموع اللي على موعدي طف=وإمسح مساحيقٍ(ن)تجمل للأوجان
إركن عطورك والمكاييج بالرف=كافي ليالي معك للصبح سهران
بعد الفتوة صرت ريشة من النحف=إلى متى ببقى مولع و ولهان
من بعد قوة صابني بالزمن ضعف=الظاهر إن الوقت لمقاطعك حان
كثر الزلازل عقبت بالجسد خسف=مافيه حال يدوم لن شان وإن زان
ما كني إلا موترٍ(ن)خارب السلف=من بعد شدة منركن جنب عطلان
ما عاد ينهض بإشتراكٍ(ن)ولا دف=هذا أنا من عقب سجات بجنان
ماعاد به قام راجع على الخلف=وأظن هذي فطرة الإنس والجان
شبعت من تبع الخراعيب بعف=بحاول أنسى حبهن عقب الإدمان
طويت صفحات الليالي مع الترف=ياكثرهن أشكال بالوقت والوان
رغبات نفسي بالتقى تنعسف عسف=الله وهبني منه عقلٍ(ن)ونسيان
العقل نعمة والهوى تابعه خف=لو يحسب إنه كاسبٍ(ن)حتم خسران
برجع لربي وأطلب العفو واللطف=منهو رجع لله بالعون كسبان
ما عاد انا واياك يا ناعس الطرف=تباعدت أحلامنا والزمن شان