تخليت عني يوم ربي عطاك شوي=تحسب إن رب أعطاك ماهو بلي معطي
تبعت السراب وتحسبه بالصحاري مي=تركت النعيم اللي قبل فيه متغطي
تصرفك هذا سي وأسوى بعد من سي=عن الحق الأبلج ما فعلته بنا شطي
توكل على الله روح أنا ما طلبتك شي=مصيرك تعود يوم وتقول أنا مخطي
يقول المثل لابد حيٍ(ن)يلاقي حي=أنا واثق بترجع عليّه ولو تبطي
ليا من عرفت الفرق بين اللظا والفي=تعود بطوعك دون قيدٍ(ن)ولا شرطي
تجيني معود تاركٍ(ن)بالزمان الغي=وكل الجنون اللي دهت راسك توطي
ظلام الليالي ما يشابه لنور وضي=وعقدٍ(ن)لبسته حتم في يوم ينفرطي
أذكرك فعلك حين رديت مد يدي=على شط بحر الود غادرت للشطي
تعداك صوتي يوم اناديك ألا ياخي=قبل لا تغادر حل حبلك من الربطي
طويت المسافة والزمن بالمقفى طي=وأنا من بعدك أشيل بالأمر وأحطي
تذوقت من بعدك لمر الفراق الني=وذا لحين قررت أكشف اللبس والخلطي
قراري صريح ولا بها كيف؟ وإلا أي؟=فؤادي قفلته عنك ماعاد ينخرطي
بعد ضاعت الفرصة كويت المعالق كي=محال نتصافى وأمرنا بيننا فُرطي
تخليت عني يوم ربي عطاك شوي=تحسب إن رب أعطاك ماهو بلي معطي