حاولت انام وحارب القلب نومي=سرت بي الاحلام والناس نيَّام
كثر على الهجس وارد همومي=سريت انا والليل في تبع الأحلام
كني غصن في مشرف الحيد يومي=تأخذني الأفكار خلفٍ(ن)وقدام
في مرقدٍ(ن)بارد وأحس بسمومي=من حر مابي كن في صدري الغام
من ضيقتي رميت بعض الهدومي=ما عاد أحس بعذب نسناس الأنسام
أون ماهو من ضعيف العزومي=لكن طرا لي هاجسٍ(ن)بالفكر خام
بأسباب ملهوف الحشا يارخومي=غنيت طاروق الهوى بأخر العام
قبل نفير الحج وقت القدومي=سامرت طيف الزين وأعطيته وسام
أعطيته لقلبٍ(ن)جريح السهومي=من رمشه اللي في فضا خافقي حام
سهم العيون أكثر عليّ الحلومي=كل ما هجعت شوي يرسل لي سهام
الليل كله بين دفع وهجومي=كني وطيفك يالغضي حرب بالشام
هزمتني وأنا عقيد القرومي=أصدرت فوقي حكم جاير بالإعدام
من عقب ما شحيت تقضي لزومي=أنا أشهد إن البخل يازين ظلاَّم
عودت من عندك كسير مهزومي=ما نلت من ليل الشقا غير الأوهام
يالله يارب العباد الرحومي=تجبر بخاطر عبد ما نام منضَّام
والمشكله لن واصل الليل يومي=عز الله إني مثل ما قيل بنلام
حاولت انام وحارب القلب نومي=سرت بي الاحلام والناس نيَّام