فديت هالطلة اللي من رأها سعيد=تنقش بمحجر عيونه بين رمشٍ(ن)نون
من عاش منها سعيد ومن توفى شهيد=وأنا جهلت المصير وصار فيني غبون
قمت أرتجف وأتشهد وأتمنى وأكيد=سيد الشعر والمشاعر صابني بالفتون
الليلة القلب نبضه مختلف والقصيد=قامت تزاحم على فكري بيوت اللحون
وأسباب ما حل بالهاجوس ماهو جديد=لكن تحرك بعد طال المدى في سكون
حركه مضنون قلبي بالكلام المفيد=اوااااه ياليل قلبي كيف صبحي يكون
ما بين فرح وحزن جريت لحن النشيد=عليك ياللي غرامه بالحشا ما يهون
العين فيها بروق وبالحنايا رعيد=وصلت من حر مابي لين حد الجنون
لكن زماني وحظي فارضه كم قيد=عجزت كسر القيود اللي تسم البدون
لولا ظروف الليالي والمكان البعيد=ما كان حالي تردى صار من دون دون
ليت الأماني تحقق كان بيكون عيد=عيد العمر لو تحقق طاب جرح السنون
يا قبلة العشق حبك ملتوي بالوريد=والفكر يتبع لقلبي بالهوى ما يخون
والله والله يا نبض الغرام التليد=مالك بقلبي بديلٍ(ن)ياللطيف الحنون
أنت الهوى والهنا وأنت العذاب الشديد=لاصرت ما أنته قريب يا بديع الفنون
أون مليون ونة وأستكن ثم أعيد=ما حل بي من غرامك مثل ورد المنون
يا جنة الحلم في هذا الزمان العنيد=ياجمرة الشوق في قلبٍ(ن)لوصلك زبون
ما بين حلمي وعلمي يا هواي الفريد=تمضي سنين إشتياقي والمحبة تمون
فديت هالطلة اللي من رأها سعيد=تنقش بمحجر عيونه بين رمشٍ(ن)نون