ياطير فوق الغصن ما بين الأوراق=بلغ سلامي للبعيد القريبي
احمل تحياتي عبر بث الأفاق=قل له كفاية لا يطول المغيبي
تعبت من طول انتظاري والأشواق=القلب ينزف مستحيلٍ(ن)يطيبي
ما يعرف بقهر البعد غير من ذاق=وأنا تجرعت القهر يا حبيبي
جرح الهوى ينزف ولا عاد ينطاق=والحمد لله دام هذا نصيبي
أضحك وأجامل والمواجع بالأعماق=تنهش بقلبي كنها نهش ذيبي
لا من ذكرت اللي له القلب تواق=ونيت ونة من فقد له قريبي
ودي بشوفه والبخت حيل منعاق=لا هو يوديني ولا له يجيبي
أعوام مرت مقفياتٍ(ن)على ساق=والشوق والحرمان فيني رهيبي
أساهر الأطياف لا وقت الإشراق=وأظنها تال العمر بتغدي بي
لا شفتها هليت ترحيب مشتاق=لا هي تناديني ولا هي تجيبي
وأنا وحلم العمر والوقت بسباق=أصدر الراحة وأجيب تعذيبي
كل يوم أشوف اليأس يحكم للأطواق=على المشاعر صار فكري غريبي
وقعت له بالغصب مشروع ميثاق=يبقى معي لين أندفن بالتريبي
لكن يا طير(ن)ورا خضر الأوراق=بلغ بحالي للبعيد القريبي