بسم الله الرحمن من نص نقرة...=دارت مكينة كاتم الصوت والنار...
نهض لصدره دوب ما حس نمره...=سلمت يدين مصمم الجكس والأر...
علامته بالوجه تاجٍ(ن)بغره...=من زينها تلفت لها كل الأنظار...
لا من قفز حرٍ(ن)معود لوكره...=أسبق من السرحان بالمشي لن غار...
من سرعته ما يبان له أثر جره...=لو له جناحٍ(ن)كان من خفته طار...
يشرح لصدر اللي مع الليل فره...=العين ما تلحق لعداد الأمتار...
يهوى لمسرى الليل والصبح بكره...=مصباحه بدارٍ(ن)بعد كان في دار...
مطواع مابه جو مشيه يعكره...=ما يشتكي من برد قارص ولا حار...
ما يختلف ممشاه في كل سفره...=من قابله يعميه وهاج الأنوار...
ما يكربه طعسٍ(ن)ولا ضلع حره...=يمشي عليها مثل مشيه على القار...
على الطريق أسرع من ظلال فكره..=كنه لراع الشوق من ولْده البار...
هذا رفيقٍ(ن)ما يقدم لعذره...=ما حط من دون المهمات الأعذار...
يحماه رب البيت من كل عثره...=رفيق دربي في طويلات الأسفار...
بسم الله الرحمن من نص نقرة...=دارت مكينة كاتم الصوت والنار...