قصيدة كتبتها منذ عدة شهور والأن جاء دور تنزيلها
علها تروق لكم
يا أقرب من النون في عيني وعني بعيد=مشاعري من صدودك مقترب يومها
أون ون اليتيم اللي فقد له فقيد=ما عاد لي قدرةٍ(ن)بالنفس وهمومـها
كتبت فيك القصايد لين مل القصيد=والنفس تعبت وعيني جافية نومها
بنك القصايد بفكري شح فيه الرصيد=ماعادت النفس تقدر تتبع حلومها
إنهار قلبي وهبط ضغط دم الوريد=كن المنايا عليَه ترسل سهومها
إن مت موتة شقي ماني بميت سعيد=وإن عشت عيشة مذلة بانت رسومها
ليتك تخيرت قتلي بالرصاص الشديد=أخير من ذبحتي بعلوم وسمومها
ساعة ذكرت البعاد أعجلت يوم الوعيد=هذي بشارة قتلت الروح بقدومها
يا ليتني مت قبل أسمعك وأنته تريد=فرقاي يا فاتنٍ(ن)روحي ومظلومها
وشلون تنسى هوانا من زمانٍ(ن)تليد=اللي رسخ بالحنايا وأوثق حكومها
ليت الهوى ياغرامي طفل توه وليد=يمكن تهون القضية واترك علومها
لكن هذا نصيبي يالغرام الفريد=أنهى حلوم الليالي وأورث كلومها
حظي أعرفه معك بالذات دايم عنيد=رماني بغبة المجهول ويعومها
ماهو بصانع جديد ولا مقدم مفيد=ما فادني في حقيقة كيف معدومها!!
ما حيلته غير يطعني وطعنه سديد=عرى مشاعر فؤادي وأحرق هدومها
يا حظ ما عاد تفرق زيد للجرح زيد=دنياي عن كل لذة ناوي أصومها
النفس كلت وملت ما تريد المزيد=من عقب قفا مهاويها و محشومها
اللي من أول قريَب راح عني بعيد=مشاعري من صدوده مقترب يومها