السلام عليكم ورحمة الله وبركاته
الأبيات بدون مقدمات
بوعدك ما عاد بكتب بالغزل=وإن كتبته لا تحسبينه صحيح
دام هذا يجيب لك مني زعل=بتركه من شان بالك يستريح
بترك السكر وأبطل بالعسل=بقفل الباب اللي يجينا منه ريح
بتجه للوصف لو فيه الملل=وبمدح اللي ما يحبون المديح
بطرد الغزلان وأزهار ونحل=وبرسم البسمة على الوجه القبيح
بزرع الريحان في جنب البصل=وباخذ الجزلة من الكف الشحيح
بجعل الطيبة سجية للنذل=والبشاعة برقع الوجه المليح
لأجلك(ي)ما يهمني قيلة خبل=دامني بكون في شعري صريح
باخذ الهين وبطل بالجزل=وبجبر المكسور وأكسر للفصيح
بتقنع بالقليل من الهلل=وأتصدق به على دين المسيح
لو فيها مثل ما قالوا خجل=السلاخة ما يحس بها الذبيح
ومن نطح بالراس في طرف جبل=الوكاد إنه على بعضه يطيح
السليم ليا وقع جوف العلل=مستحيل إنه يبا يطلع صحيح
والمصيبة كل ما عالج خلل=يجيك بكبر منه مع إني نصيح
الحطب لا غرقه سارح وبل=ما تشب النار والما ما يفيح
والرجل لا من تعود للكسل=ما يجي له باللقا صوت وفحيح
يحط راسه وين ما حط الرجل=كل شيء(ن)في حياته يستبيح
العرب تقول قالوا بالمثل=ما يحس بوجعته غير الجريح
ومن يدس الراس في جوف الرمل=ما يحس بروعة الكون الفسيح