ياحي من هو يمنا توه لفا=مدري مصادف جيته وإلا ميول
جية عزيز القلب منها يرجفا=خلف الحنايا كن تركض به خيول
أرحب هلا راع الوفا يلقى وفا=يا شبه وضحا في صحارينا جفول
ياريح مسك ٍ(ن)بالنسيم يهفهفا=مدري هنوف ٍ(ن)مأخذه حسن البتول
يا شهد ياللي فيك من ربي شفا=الشهد يشفي للقلوب وللعقول
براد صيف وفيك بالمشتا دفا=قد ايش بوصف للمحاسن ويش اقول
الحسن واضح فيك من وجه وقفا=يا حظ من هو للحسن هذا يطول
كامل مكمل ياقمر نورك ضفا=نورت شعري والمشاعر والأصول
لو أنكتب قصيد كلي ما كفا=مير السموحة ماش بيديني حلول
النحل دونك والبعاد يكلفا=غير الظروف الثانية شيء مهول
اخاف من شح العطايا والجفا=اللي تسم الحال وتعقب علول
وأخاف من شيء عن عيوني خفا=وأخاف من هرج المعادي والعذول
وأخاف من صدٍ(ن)يعكر للصفا=واكبر مصبة تذبح الود الزعول
ياحي من هو يمنا توه لفا=مدري مصادف جيته وإلا ميول