أسعدكم الله أين ما كنتم
اليكم الأبيات بدون مقدمات
عذرت من تبع الهوى يا أريش العين=ما جبت من تبعه يكود المتاعب
واليوم شفت البعد صاحبه بعدين=بُعد المسافة والزمن والمطالب
أسهر وخلق الله تنام متهنين=العود ناحل والشكل حيل شاحب
ضعفت عظامي واللحم والشرايين=من كثر ما سويت فيني مقالب
لا من نخيتك قلت لي صبر بعدين=والشوق يشلع فالحشا بالمخالب
ما تجزعك تكفي ليا قلت تكفين=صفي لنبع الحب فوقه طحالب
قلتي:تحلَّم وينك أنته وأنا وين=مشارق الأيام غير المغارب
وشلون بعد اللين للحب تقسين=جفاك عكر لي جميع المشارب
والله حسافة صح ما يكمل الزين=حتى لو إنه صار بأعلى مراتب
من عقب سلمتك فؤادي تذلين=قلبٍ(ن)تولع فيك والحب غالب
الوجد كنه داخله طعن سكين=كن الضلوع من الهوى قش حاطب
أسهر ليال طوال وأنتي تنامين=ما جاء ببالك ترحمين لمصالب
وأنا أدري إنك باهوى بي تدرين=لكن ياتي يوم فيه نتحاسب
وأذكرك بأيام كنتي تمرين=ما كني إلا واحد من الأجانب
حتى السلام يعز فوقي تردين=وأنا لحبك صرت قسيس راهب
بنيت لك في داخل القلب ديرين=دير الغرام ودير صاحب لصاحب
أبيك في وقت القساوة تلينين=لو هي دقائق بإستراحة محارب
لكن غلبك الحظ والوقت والبين=أكبر بليَّة في جميع المثالب
لا صار من تهواه يسوى ملايين=مير الزمن يحداه والحظ خارب
بيع الهوى واشتر عُمر يا أريش العين=الحب ما يجلب يكود المتاعب